- Obrek 32 hilabeteko iraupena izango dute eta 7 milioi eurotan esleitu dira.
Azpilur Euskadik Burtzeñako UERT lursail zaharra berroneratzeko lanak abiarazi ditu, hain zuzen ere lursail horretako 65.000 metro karratuetako albo eta gainazala iragazgaizteko behar diren obrak egingo dira, erabilera berrietarako arriskurik ez dagoela bermatuz, lurpeko eta azaleko uretan lixibiatuak izan dezakeen eragina murriztuz eta aldi berean lurzatiaren kota handituz, etorkizuneko urbanizazioa urpean geratzea eragozteko.
Jarduketa honetan, AZPILUR, URA eta Ingurumen Sailburuordetza eta Ihobek lehentasunezko kokalekuen kudeaketa optimizatzeko sinatutako hitzarmenaren bidez ezarritako lankidetzaren adibide, lurraren gainazala eta alboa iragazgaiztea erabaki da, hainbat aukera aztertu ondoren.
Alboko iragazgaizte-lanak egiteko, bentonitazko pantaila plastiko bat eraikiko da. Lurra egokitu aurretik, bentonita-zementuzko pantaila hori egingo da, 45 zentimetroko lodiera eta batez beste 10 metroko sakonera izango dituena, ingurunearen babesa bermatzeko.
Lur-mugimenduari dagokionez, lanak faseka egingo dira. Lehen etapan, lurra behin betiko kotatik bi metro altxatuko da, finkatze-prozesu naturala bizkortzeko. Finkatze-prozesu horiek amaitutzat jo ondoren, aurrekarga horretan erabilitako soberako materiala kendu egingo da.
Ondoren, 20 zentimetroko zagor-geruza zabalduko da, eta, azkenik, gainazal-tratamendu bat aplikatuko da, gainazal osoa behar bezala zigilatzen dela ziurtatzeko.
Obrak bi fasetan egingo dira: lehenengoa, 14 hilabetekoa, eta bigarrena, 18 hilabetekoa. Hau da, guztira 32 hilabeteko iraupena izango dute, eta 7.039.580,78 €ko aurrekontua.
Burtzeñako proiektuaren osoaren bigarren esku-hartzea da hau, lurzoruen birsorkuntzari dagokionez. Lehenengoa 2024an hasi zen eta Astilleros eta Zentral Termikoko lursail zaharretan 73 mila metro koadro baino gehiago berroneratu ziren.
Burtzeña leheneratzeko proiektua, ia 290.000 m2-ko azalera hartzen duena, Ezkerraldeko lehentasunezko jarduketako Eskualdeko Plan Estrategikoetan txertatuta dago, erakunde publikoek lagunduta. Azpilurrek 2021ean jarri zuen martxan proiektua, lurzoruak erosita eta eremuaren hirigintza izapidetuta. Aurreikusitako berroneratze eta lurrak berreskuratzeko proiektuak gauzatu ondoren, Burtzeñako Enpresa Parkea sortuko da bertan.
