Eusko Jaurlaritzak amaitutzat eman ditu Errotaberri industrialdea urbanizatzeko lanak, 13,6 milioi euroko inbertsioaren ondoren.
- Industria-erabilerarako 20 partzela berri urbanizatu dira guztira, eta horietatik 13 sustapen publikokoak dira.
- Zarauzko Udalak eta Gipuzkoako Foru Aldundiak 1,5 milioi euroko diru-laguntza eman dute urbanizazio-proiektuan.
- Industria, Trantsizio Energetikoa eta Jasangarritasuneko sailburuak industrialdea bisitatu du, Xabier Txurruka Zarauzko alkatearekin eta Andoitz Korta Industria Sustapeneko sailburuordearekin batera.
- Eusko Jaurlaritzak 26 milioi euroko inbertsioa aurreikusi du Gipuzkoan 2026rako, berroneratzeko eta industria-lurzoruaren garapen berrietarako aurreikusita dauden 15 proiektuetan.
Mikel Jauregi Eusko Jaurlaritzako Industria, Trantsizio Energetiko eta Jasangarritasuneko sailburuak Errotaberri industrialdeko 18.500 metro koadroko lurzoru urbanizatua aurkeztu dio gaur goizean Xabier Txurruka Zarauzko alkateari. Kudeaketa prozesu luze baten ondoren, Eusko Jaurlaritzak, Sprilur sozietate publikoaren bitartez, amaitutzat eman ditu Errotaberri industrialdea urbanizatzeko lanak, 13,6 milioi euroko inbertsioaren ondoren.
Egindako obretatik erabilera industrialeko 20 partzela berri sortu dira, eta horietatik 13 sustapen publikokoak dira. Zarauzko Udalak eta Gipuzkoako Foru Aldundiak 1.570.368,99 euroko diru-laguntza eman dute urbanizazio-proiektuan laguntzeko.
Mikel Jauregi Industria, Trantsizio Energetiko eta Jasangarritasun sailburuak, Xabier Txurruka Zarauzko alkateak eta Andoitz Korta Industria Sustapeneko sailburuordeak Errotaberri bisitatu dute gaur goizean, Sprilur eta Beterri Kosta Industrialdeko zuzendariekin batera, Txaber Ouro eta Jesus Mari Eraña, hurrenez hurren.
Bisita horretan, Jauregi sailburuak nabarmendu du “proiektuaren garapenean Zarauzko Alkatearen prestasuna, emandako laguntza eta izandako lankidetza. Eusko Jaurlaritzan uste dugu industria-lurzoruaren erreserbarekin aurrera egitea funtsezkoa dela gure industria hazteko eta industria berria erakartzeko, bai lurzoruak berroneratuz, bai dauden espazioen garapen berrien bidez ”.
Bere ustez, “Errotaberri, Urola Kostan industria-lurzoru berria izateko egindako obrarik garrantzitsuenetako bat, industria berria erakartzeko eta instalatzeko eta, horrekin batera, lanpostu kualifikatu berriak sortzeko Eusko Jaurlaritzak lurzoru industriala garatzeko egindako apustuaren adibide argia da”.
“Udalak eskerrak eman nahi dizkio Eusko Jaurlaritzari-Sprilurri, Errotaberri industriagunea zabaltzeko egin duen inbertsioarengatik. Zailtasun guztiak gaindituta, emaitzak merezi izan du, zalantzarik gabe”, adierazi du Xabier Txurruka Zarauzko alkateak. “Lehenengo enpresa iritsi da iada Errotaberri industriagunearen zabalpenera eta lanean ari gara etorkizunean enpresa gehiago sustraitu daitezen gure herrian. Zarautzek behar zuen eta jada badu eskaintzeko lurzoru industriala”.
Beterri Kostako Industrialdea, Hitzarmen Batzordeko presidentzia duena izan da urbanizazio-prozesua gauzatzeaz arduratu dena, honako jarduera bereizgarri hauek izan dituen prozesua:
- Olaa errekastoa bideratzea sektoreari eragiten zion uholde-arriskua saihesteko, URAk 2019. eta 2020. urteen artean egindako proiektua.
- Errotaberri eta A8 autobidearen gaineko zubia lotzen dituen bidea eta hiri-bilberako sarbidea eraikitzea.
- Eremuan finkatutako enpresekin egindako lankidetza-akordioak, besteak beste, irisgarritasun-baldintzak hobetu dituztenak.
- Etxetxo baserriaren behin betiko integrazioa, hasierako proiektuan aurreikusitako eraistea baztertu ondoren.
Dagoeneko ezarri da enpresa berri bat Errotaberriko sustapen publikoko lursailetako baten, Hosokawa hain zuzen ere. Honez gain, erreserba-kontratu bat sinatu da beste enpresa batekin; eta beste bat Iberdrolarekin, instalatzen diren enpresei argindar-hornidura ziurtatuko dien azpiestazio berri bat instalatzeko.
Zarauzko Errotaberri eremuak 195.500 m2ko azalera du guztira, eta 96.000 m2 baino gehiagoko eraikigarritasuna. Horietatik 38.112 m2 urbanizazio-prozesuaren aurretik abian zeuden jarduerekin finkatutako pabiloiei dagozkie.
Urbanizazio prozesu honi esker industria jarduera eta bizitegi-erabileraren arteko bizikidetza ahalbidetu da, KSB ITUR bezalako industria-jarduera ezaguna eta Etxetxo baserria kasu.
Eskuzaitzeta eta Oikiako proiektuekin batera, Errotaberrikoa da azken urteetan Sprilur Taldeak-Eusko Jaurlaritzak Gipuzkoan industria-lurzorua sortu eta egokitzeko egin duen lanik garrantzitsuenetakoa.
2026.urteari begira, 26 milioi eurotik inguru inbertsioa du aurreikusita taldeak Gipuzkoako Lurralde Historikoan dituen 15 proiektuetan; hauetako 7 berroneratze proiektuak dira, 11,5 milioi eurotik gorako aurrekontua dutenak, eta beste 8ak garapen berriak, 14,4 milioi eurotik gorako aurrekontuarekin.
